खेतबारीमा गहुँ छर्ने वेला रासायनिक मल नपाएपछि स्थानीय किसानहरू समस्यामा परेका छन् । मागअनुसार आपूर्ति हुन नसक्दा अहिले डिएपी मलको अभाव भएको छ । कतिपय किसान खेतबारी खनजोत गरेर ठिक्क पारे पनि मल पाउने आसमा गहुँ छर्न पर्खिरहेका बताए । गहुँ छर्ने वेला हाल्नुपर्ने डिएपी मलको पर्खाइमा रहेको बताए । गत असोजमा लगेको ९० बोरा डिएपी मल सकिएपछि कृषि सामग्री कम्पनी लिमिटेडको प्रादेशिक कार्यालय धनगढीसँग थप मल माग गरेको उनले बताए । यहाँ मल नपाएपछि सीमा नाकानजिकका किसान सीमावर्ती भारतीय क्षेत्रबाट लुकीछिपी मल ल्याउने गरेका छन् । सीमावर्ती कैलारी गाउँपालिकाको हसुलियाका एक किसानले भारतबाट दुई बोरा मल ल्याएर तोरी छरेको बताए । ‘गाउँको सहकारी धाउँदा मल पाइएन । पारिबाट ल्याएर तोरी छरेँ,’ उनले भने । सरकारी अनुदानको मल बिक्री गर्दै आएको कृषि सामग्री कम्पनीको प्रादेशिक कार्यालय धनगढीका प्रबन्धक नवलसिंह बोगटीले गहुँ छर्ने वेला आवश्यक पर्ने डिएपी मल मागअनुसार वितरण गर्न नसकिएको बताए । हिउँदे बालीका लागि यहाँ करिब सात हजार मेट्रिकटन डिएपी मल आवश्यक पर्ने कार्यालयको अनुमान छ । कार्यालयले साउनयता तीन हजार दुई सय ३४ मेट्रिकटन डिएपी मात्र बिक्री गरेको छ ।

हाल एक सय १९ मेट्रिकटन डिएपी मौज्दात रहेकोमा त्यसले माग धान्न नसक्ने बोगटीको भनाइ छ । विक्रेताहरूले आवश्यकताअनुसार मल नपाएको गुनासो गरिरहेको उनले स्वीकार गरे । कृषि सामग्रीले कैलालीमा चार सय १२ सहकारी तथा एग्रोभेटमार्फत मल बिक्री गर्दै आएको छ ।

‘अहिले साल्ट टे«डिङमा पनि मल छैन । तर, साउनयता साल्ट टे«डिङले पनि केही मात्रामा मल बिक्री गरेकाले अहिले करिब ८० प्रतिशत किसानले डिएपी मल पाएको अनुमान छ,’ कृषि सामग्रीका प्रदेश प्रबन्धक बोगटीले भने । अब थप मल यो महिनाको अन्त्यतिर आउने उनले बताए । त्यतिवेलासम्म किसानले गहुँ छरिसक्नुपर्छ ।

युरियाको भने तत्काल अभाव नरहेको कृषि सामग्रीले जनाएको छ । कृषि सामग्रीसँग अहिले एक हजार आठ सय ७३ मेट्रिकटन युरिया मौज्दात छ । कृषि ज्ञानकेन्द्रका अनुसार कैलालीमा करिब ३५ हजार हेक्टरमा गहँु खेती हुने गरेको छ ।