धार्मिक भेलामा भएको भागदौडमा मृत्यु हुने मानिसको सङ्ख्या १२१

कसरी भयो घटना : केही अधिकारीहरूले उक्त कार्यक्रममा सहभागी भएका मानिसहरूले प्रवचनकर्ताको पाउको धुलो लिन खोज्दा भागदौड भएको जनाएका छन्। तर केहीले भने हुरीले धुलो फैलाउँदा कोलाहल मच्चिएको र भागदौड भएको बताएको रोएटर्सले जनाएको छ । भिडमा च्यापिँदा केही मानिस बेहोस भएर ढलेपछि उनीहरूलाई अरू मानिसले कुल्चिन पुगेका थिए । उत्तर प्रदेशको विपद् व्यवस्थापन केन्द्रले सोमवार मृतकहरूको सूची सार्वजनिक गरेको छ। त्यसमा १२१ जनाको मृत्यु भएको जनाइएको छ । प्रत्यक्षदर्शीहरूका अनुसार मानिसहरू भिरालो ठाउँमा लडेपछि पानी भएको खाडलमा खसेका थिए । सबै मानिस, पूरै भिड, महिला र बालबालिका पनि एकैचोटि निस्किए, मङ्गलवार उक्त स्थानमा परिचालित प्रहरी अधिकारी शीला मौर्यले भनिन् । त्यहाँ पर्याप्त ठाउँ थिएन अनि एकमाथि अर्को गर्दै मानिसहरू लड्न थाले, उनले भनिन् । यसअघि सत्सङ्गका लागि तयार गरिएको पालभित्र अत्यन्तै गर्मी भएका कारण उक्त घटना भएको हुन सक्ने विवरण सार्वजनिक भएको थियो । हाथरस जिल्लाको मुगलगढी गाउँमा उक्त कार्यक्रम भएको थियो ।