पिपुल्स न्युज : सप्तरीको सप्तकोशी नगरपालिका ११ भगनिका पत्रकार एवम् सुचनाको हकका अभियन्ता कैलाश माझीलाई ज्यान मार्ने धम्कीको बिषय देशव्यापी हुँदा समेत स्थानीय पालिका मौन रहेकाे छ।
ज्यान मार्ने धम्कीपछि जिल्ला प्रहरी कार्यालयले छानबिन शुरु गर्दा समेत यस बिषयमा सप्तकोशी नगरपालिकाले कुनै पनि किसिमको प्रतिक्रिया नदिएकोप्रति स्थानीयले आशंका व्यक्त गरेका छन । पत्रमा सुचनाको माग गरेर पालीकालाई दुःख दिएको बिषय उल्लेख भएकाले यसमा माझीले अत्याधिक सूचना माग गरेका स्थानीय तह र यस अन्तर्गतका निकायहरुमा सबैको नजर देखिन्छ ।
सप्तकोशी नगरपालिकामा पटक पटक बिभिन्न शिर्षकमा सूचनाको माग गर्दै आएका अभियन्ता माझीलाई यस अघि सप्तकोशी नगरपालिकाले साइबर क्राईमको अभियोगमा उजुरी गरेको थियो । यस्तै माझीले ६ बर्षदेखि बिदेशमा बसेका विद्यार्थीलाई एस.ई.ईमा उतिर्ण गराउने सप्तकोशी १० भगनीको श्री जनता माध्यमिक बिद्यालयका प्रधानाध्यापक श्याम नारायण चौधरीको बिरुद्धमा राष्ट्रिय मिडियामा समाचार प्रशारण गरेका थिए ।
यसैगरी सप्तकोशी ९ कमलपुर स्थित श्री आधारभूत विद्यालयका प्रधानाध्यापक ब्रम्हदेव चौधरीले विद्यालय प्रांगणमा मदिरा सेवन गरेको विषयलाई लिएर समाचार सम्प्रेषण गरेका थिए । यस्तै गंगाजलीखोलामा अबैध बालुवा उत्खननको बिरुद्धमा बिगत केही बर्षदेखि बिरोध गर्दै आएका थिए। उपरोक्त घटनाक्रमसँग जोडिएका व्यक्तिहरुबाट उनलाई यसअघि सम्झाउने, चेतावनी दिने र भेटेर धम्की दिने कार्य समेत भएको माझी बताउछन । यतिबेला छानबिनमा रहेको यो बिषयले राष्ट्रिय स्तरमा चर्चा पाएको छ।
सूचनाको हकका लागि राष्ट्रिय महासंघले विज्ञप्ती निकालेर आपत्ति प्रकट गरेको छ । माझी सूचनाको हकका लागि राष्ट्रिय महासङ्घका सदस्य, जागौँ नेपाल मधेस प्रदेशका सदस्य सचिवका साथै पिपुल्स न्युज र अन द स्पोट न्युजका सप्तरी संवाददाताका रूपमा कार्यरत छन् । गत मंगलबार बिहान भगनी स्थित आफ्नो घरको कोठाबाहिर भेटिएको उक्त पत्र रात्री १२ देखि ५ः३० को बीचमा राखिएको हुनसक्ने उनको अनुमान छ ।
उनी भन्छन, “म राती करिव ११ः३० बजे तिर सुतेको हुँ, बिहान ५ः३० मा उठेर ढोका खोल्दा ढोका बाहिर चप्पल नजिकै पहेँलो खाममा पत्र भेटेँ। मेरो बिचारमा यो पत्र रात्री १२ देखि ५ः३० को भित्र राखिएको हुनुपर्छ ।” पत्र भेटेपछि यस बिषयमा उनले न्यूज २४ मा प्रसारण हुने कार्यक्रम सिधा कुरा जनतासँग मार्फत जानकारी गराएका थिए भने जिल्ला प्रशासन कार्यालय राजबिराज मार्फत आफ्नो सुरक्षाको लागि माग गरेका थिए ।
____के छ पत्रमा ? ____
# स्थानीय तहहरुमा फोन मार्फत तथा इमेल मार्फत सूचनाको लागि पटक पटक पत्र आउने गरेको
# सूचना नदिने र पैसा नदिने स्थानीय तहहरुलाई सामाजिक सञ्जाल मार्फत बदनाम गर्ने गरेको
# यो पत्रको बेवास्ता गरे घरमै आई गोलि हानेर हत्या गरिने, घमा आगो लगाइदिने
कैलाश माझीको घरमा किलर समूहकै व्यक्ति निगरानी गरिरहेको, फोन ट्«याक गरि सूक्ष्म अध्ययन गरिरहेको
# यो पत्र मिडियाबाजी गरेको खण्डमा वा प्रहरीमा खबर गरेको परिणाम मृत्युबाट चुकाउनुपर्ने
# सफाईका लागि भारतीय नं. ००९१–८९६२२०७५१० मा सम्पर्क गर्नुपर्ने
(प्रकाश यादवः मधेशी भाइरस किलर समूह, कुनौली भारत)