Peoples News : डेङ्गी रोग फैलाउने एडिज नामक लामखुट्टेले जमेका पानीमा अण्डा पार्छ । “त्यसैले यो रोग फैलनबाट रोक्न सबैभन्दा मुख्य काम पानी जम्ने ठाउँ नष्ट गर्नु नै हो,” डा मरासिनीले भने । “अझ विशेषगरी सहरबजारतिर पुराना टायर यत्तिकै फालेर राखिएका छन् भने त्यसले लामखुट्टेलाई हुर्कने असाध्यै अनुकूल वातावरण दिन्छ,” उनले विगतको उदाहरण दिँदै टायरकै कारण वीरगञ्जमा डेङ्गीको प्रकोप फैलिएको सम्झना गरे । “२०६३/६४ ताका वीरगञ्जमा निकै डेङ्गी फैलिएको थियो। झण्डै चार सयलाई सङ्क्रमण भएको थियो।” “त्यतिखेर त्यहाँ आन्दोलन भयो र बसपार्कनिर धेरै टायर राखिएको एउटा ठाउँ रहेछ। तिनै टायर आन्दोलनकारीले जलाएपछि लगत्तै सङ्क्रमण स्वाट्टै घटेको थियो।” डेङ्गी सङ्क्रमण रोक्ने मुख्य उपाय भनेको लामखुट्टे नियन्त्रण हो . डेङ्गी रोगसम्बन्धी अनुसन्धानमा संलग्न उपप्राध्यापक रेश्मा तुलाधर भन्छिन्, “मोटर वर्कशप वरपर रहेका टायरहरूबाट सचेत हुनुपर्छ । “कतिपय ठाउँमा पानी जमेर नबसोस् भनेर त्यसरी फालिएका टायरमा प्वाल पारिदिने गरेको पनि पाएको छु ।” त्यस्ता टायर वर्कशप काठमाण्डूमा पनि चक्रपथ वरपर धेरै रहेको भन्दै उनले सचेत हुनुपर्ने बताइन्।
